Dei gamle veninnene frå Book Club (2018) er tilbake – dei har overlevd pandemien, takka vera kvarandre og bokklubben. No skal dei ta igjen alt det tapte, og kva er då betre enn å reisa på ferie utanlands? Særleg når høvet er at evigsingle Vivian omsider skal gifta seg.

Kven sit eigentleg i enden av telefonen og sel deg ymse velgjerande formål? Eg vil bli svært overraska om det vanlegvis er så vanvittig som i denne dokumentarserien om telefonseljarar i USA og opplegget bak.

Den utmerkte astrofysikaren Ben (Stanfield) har enda opp som deprimert og utilpass turistguide i New Orleans. Ein tvilsam prest (Wilson) dukkar opp og vil at Ben skal bruke det såkalla skrømtkameraet sitt til å forstå kva som skjer i herregarden der Gabbie (Dawson) og sonen har flytta inn. Ben er skeptisk til alt, men treng pengar. Han må freiste å finne helten i seg sjølv når det brått kryr av skrømt.

Paris, 1935: Dei to veninnene Madeleine (Tereszkiewicz) og Pauline (Marder) slit med å lukkast som høvesvis skodespelar og advokat. Då Madeleine vert skulda for å ha drepe ein kjend teaterprodusent, satsar dei på å utnytta merksemda rettssaka får frå media. Men dette finn ikkje den verkelege mordaren seg i, så kva skjer då?  

Dei legendariske mutantskjelpaddebrørne Leonardo (Cantu), Michelangelo (Brown Jr.), Donatello (Abbey) og Raphael (Brady Noon) er tilbake. Kvartetten vil freiste å få innpass hjå menneska gjennom heltemodig kamp mot skurken Superfly i lag med mennesket Angie (Edebiri), som vil gjere eit skup for skuleavisa for å redde ryktet sitt. Det er nok viktigare å imponere Angie enn å redde New York for gjengen som drøymer om ein veg ut av kloakken.

Som vanleg pregar overflod av pengar og dårleg smak gatene i Cannes under den store filmfestivalen i mai. Det kryr òg av kjekke filmfolk og -nerdar frå heile verda. For ein entusiast er det artig å støyte på Pedro Almodóvar i eit smug, og sjå gullpalmevinnaren frå i fjor og juryleiaren i år, altså Ruben Östlund, skubbe på barnevogna i sola.

Beau Is Afraid har ikkje aldersgrense seks år, slik det vart hevda i Brit Aksnes’ filmmelding sist veke. Feilen oppstod då det vart opplyst om dette i pressevisingsoversikta frå kinoen, men eit enkelt søk ville vist at den rette aldersgrensa var 15 år. Denne grensa er sett av distributøren etter retningsliner frå Medietilsynet, som fører tilsyn med at aldersgrensa er sett riktig. Filmmeldaren og Dag og Tid orsakar.

I Lausanne i Sveits kryssar vegane til to menn med svært ulik bakgrunn kvarandre. Godt vaksne Louis (Campan) jobbar i eit gravferdsbyrå, mens halvvaksne Igor (Jollien) leverer økologiske grønsaker frå den spesialbygde sykkelen sin. Han har cerebral parese og eit intenst eksistensielt forhold til livet og ikkje minst døden.

Irland, 1981: Familien til Cáit (Clinch) slit, og då mor skal ha endå eit barn, blir Cáit send til ei eldre kusine og mannen hennar. Cáit får merksemd og omtanke hjå Eibhlín (Crowley) og Seán (Bennett) Kinsellah heilt frå starten – eit nytt konsept for den stillfarne jenta. Eit mørke finst likevel også i dei lyse, store romma på den vakre garden.

Norwegian Dream er eit kjærkome polsk-norsk drama som handlar om retten til ryddige arbeids­tilhøve og til å elske kven ein vil.