Meldingar i dagsnyttspaltene skaper somme gonger aktualitet som vekkjer mindre trivelege minne. Slik vart det med ein lengre nekrolog som var å sjå i amerikanske aviser eller å høyra i andre medium i USA 7. juli i år: Priscilla Johnson McMillan var død i bustaden sin i Boston, litt over 80 år gamal. Ho var ein kjend journalist og forfattar, og namnet hennar var knytt til to andre enda meir kjende personar: President John F. Kennedy og Lee Harvey Oswald. Ho var av dei svært få som hadde hatt utførlege samtalar med dei begge under temmeleg ulike tilhøve, får ein seia. Den siste har fått status som Kennedys drapsmann i Dallas i Texas fredag 22. november 1963. Sjølv vart Oswald skoten av ein nattklubbeigar dagen etter for ope filmkamera da han skulle overførast til politisjefen i Dallas i samband med den vidare rettsgranskinga av drapet på Kennedy.