I mai 2017 gjekk det ut bod frå SalMar-konsernet: Selskapet ville byggje eit nytt lakseslakteri med filetanlegg i Nord-Noreg, og kystkommunane vart inviterte til å kome med tilbod om lokalitetar som kunne oppfylle ønskelista til SalMar. Invitasjonen bad kommunane om å fortelje «hvilken infrastruktur de kunne tilby for en av de største industrisatsingene i regionens historie».

Grunnrenteskatten på oppdrett skal berre gjelde vinstane frå sjøen. Men det er landanlegga som har blitt kampsona.

I Noreg gjev lova ein enkel og klar regel for arbeidsgjevarar som vil permittere tilsette: Dei må halde fram med å betale ut løn dei første 15 dagane av permitteringa. Lov om lønsplikt under permittering er meint å gje ein viss tryggleik for arbeidstakarar. Det bør ikkje vere for enkelt for arbeidsgjevarane å ty til permittering. Men det finst eitt unnatak frå denne lova, og det gjeld fiskeforedlingsbedrifter. Unnataket har bokstaveleg tala naturlege årsaker: Ein industri som er avhengig av leveransar frå fiske, er spesielt utsett for svingingar i råstofftilgangen. Vêr og vind og sviktande fiske er vanskeleg å føresjå, det er store sesongvariasjonar, og mangel på råstoff kan føre til at arbeidsfolk i landanlegga blir gåande gjerandslause. I denne industrien har difor staten teke ansvar for å betale ut dagpengar til dei som blir permitterte, frå dag ein.